38 lagun apuntatu ziren atzo eguerdian Merkatu Plazan antolatutako Mintzodromora. Batxilergoko ikasleak, irakasleak —aktiboak zein ohiak—, berbalagunak, euskaltegiko kideak... profil eta adin desberdinetako herritarrak batu ziren elkarrekin euskaraz aritzeko.
Gai desberdinak proposatu zituzten antolatzaileek: euskararen erabilera, atzoko ospakizunaren eta bestelakoen (Korrika, Euskaraldia) balioa... baina baita hizkuntzaz apartekoak, hala nola, enplegua eta etorkizun profesionala. Bospasei laguneko taldeetan elkartu ziren eta, gaia aldatzen zen bakoitzean, mahaiz ere aldatzen ziren, solaskide desberdinekin aritzeko. Ordu betez, elkartruke polita izan zuten belaunaldi eta euskara maila desberdinetako ermuarrek.