BPTD, Basque Precision Technology District, 2019an eratu zuten eragile publiko eta pribatuek eta gaur egun Debabarreneko eta inguruetako prezisioko teknologia arloko 41 enpresa batzen ditu bere baitan (bost dira Ermukoak). Iaztik, Iñigo Perez-Arregi De Codes (Donostia, 1968) da elkartearen presidentea. Donostiarra den arren, ondo ezagutzen du bailarako industria, bere lan-ibilbide osoan zehar bailarako enpresetan lan egin du eta. Duela hogeita bost urtetik Eibarren dihardu, EPC enpresan. Bertan erantzun ditu DKTren galderak, elkarteak ekainaren 14an Ermuko Izarra Centren egingo duen urteko batzar nagusiaren aurretik.