Aurrekontuen partaidetza-prozesu berria aurkeztu du gaur Ermuko Udalak eta hurrengo astean bertan jarriko da martxan, prozesuaren inguruko informazio-orriak etxez etxe bidaliz. Martxoa proposamenak aurkezteko hilabetea izango da eta, apirilean, jasotako proposamenen bideragarritasuna (ekonomikoa, juridikoa, teknikoa...) aztertzeko tartea hartuko du Udalak. Maiatzean bideragarri diren proposamenen zerrenda aurkeztuko da eta herritarrek botoa emateko aukera izango dute (bakoitzak bere adin-tartean). Ekainean jakinaraziko dira proposamen bozkatuenak eta 2026ko Aurrekontuen ekitaldian sartuko dira.
Proposamenak eta erabakiak, adinka
Guztira banatuko diren 250.000 euroek 2026ko Aurrekontuaren %1a suposatuko dute eta adinka banatutako lau sektore desberdinek erabakiko dute zein proiektutara bideratu. Adin-tarte bakoitzak diru-kopuru desberdin bat jasoko du: Haurrek (6-13 urte) 30.000 euro izango dituzte, gazteek (14-29 urte) 50.000 euro, helduek (30-64 urte) 85.000 euro eta nagusiek (65 urtetik gorakoek) beste 85.000 euro.
Herritarrak inplikatzeko deia
Aurrekoetan inkesta soilik egiten zela kontuan hartuta —enplegua, etxebizitza, gazteriak... alorrak markatuz eta beste guztia instituzioen esku egonik—, prozesu berri hau "salto garrantzitsu" bezala kalifikatu du alkateak: "Demokrazia parte-hartzailearen beste ariketa bat da, non herritarren ideiek eta proposamenek eragin zuzena izango duten udalerriaren hobekuntzan". Horregatik, herritarrak guztiak "inplikatzera, proposatzera, eztabaidatzera eta erabakitzera" animatu ditu, "Udalak egiten duen lanaz gain, herritar bakoitzaren parte hartzearekin eraikitzen delako Ermua".