Kontzentrazioa 13:30ean izango da, Ermuko plazan, eta egun horretan bertan Rafaheko mugara iritsiko den nazioarteko martxa Gazara iristearekin batera egingo da. Martxa honetan 50 herrialde baino gehiagotako ehundaka lagunek parte hartzen dute, Euskal Herrikoak barne, eta 2007tik Gazako biztanleriari ezarritako blokeoa salatu nahi dute. Blokeo hori ia erabatekoa bihurtu da, joan den martxoaren hasieran Israelek bonbardaketak berriz hasi ondoren. Praktika horren helburua ahalik eta pertsona gehien gosez hiltzea da, palestinarrak beren lurra uztera behartzeko eta Israelgo estatu koloniala bertara zabaltzeko. Ermua Palestinarekin Ekimenak babesa eman nahi dio Gazara Martxatik egindako deialdiari, gobernuei exijitzeko hitzetatik eta adierazpenetatik haratago, genozidioa gelditzeko lanean has daitezela eta behingoz neurriak har ditzatela Israel presionatzeko, estatu kolonial honekiko harreman militar eta komertzial guztiak hautsiz.
'CAF, jaitsi zaitez apartheidaren trenetik!' manifestaziora joateko deia
Horren harira, Ermua Palestinarekin Ekimenak larunbat honetan Donostian egingo den manifestazio nazionalera joateko deia egin du, euskal enpresek eta erakundeek palestinarren genozidioan duten inplikazioa salatzeko. Egun horretan, Gipuzkoako hiriburuan CAF enpresaren urteko batzarra egiten da. Enpresa hori Zisjordaniako eta Jerusalemgo legez kanpoko kolonia sionistak lotuko dituen tranbiaren eraikitzeko arduraduna da. Proiektu honek asentamendu horiek sendotzea du helburu, palestinar herritarrak Zisjordaniatik ere kanporatzeko tresna direlarik, eta NBEk legez kanpokotzat jo ditu.