Javi Alberdi Memoriala arrakastatsua izan zen

Nahi beste aldiz igo zezaketen, behar zuten beste denbora erabiliz. Igotzen hasi aurretik bi euroren trukeko txartela eskuratuta, ehunka pertsonek ekin zioten 791 metrora dagoen gailurrera arteko ibilbide malkartsuari, gune batzuetan %30 desnibela ere hartzen duena. Artarrai eta Hiru Txikiak Trail taldeak antolatutako ekimen honen bitartez jasotako dirua SLC6A1 Spain elkartera eta Hugo M.D. ermuar gazteak bizi duen entzefalopatia epileptikoaren gaitzaren ikerketara bideratuko da. 

Javi Alberdiren omenez landatutako haritzean lagatako oroigarria, Urkora bidean. Argazkia: Estibalitz González.

Erronka deigarria zen batzuentzat, desafio tentagarria; kirolaren bitartez elkartasuna erakusteko aukera beste askorentzat. Lagun kuadrillek eta familia osoek hartu zuten parte; egon zen goizean joan eta arratsaldean errepikatuz igoera bikoiztu zuenik eta baita lau, bost, sei… bederatzi aldiz tontorra egin zuenik ere. Baina igoerarik hunkigarriena eta haren baten ahaztezina bizi izan zuten Urkoko tontorra euron eskuekin jo ahal izan zuten mugikortasun murriztuko hiru lagunek:  Iñigo, Amets eta Oier. Montes Solidarios, Ezina Ekinez Egina, Zure irifarra Nire Indarra eta Marea Urdina Elkarteen laguntza ordainezinari esker, aterri zela aprobetxatuz, jarleku berezietan kokatuta sei-zortzina boluntariok altxatu zituzten gailurreraino, eta txalo eta animo artean hartu zituzten bertan. Hunkituta beraiek eta euron irribarrea ikusten are emozionatuago lagundu zituzten ezker-eskuma eta aurre-atzean jarrita goraino eraman zituzten garraiatzaileak.

Antolatzaileak pozarren zeuden, helburuak beteta. Parte hartutakoen artean material desberdina zozketatu zen eta sari berezia izan zuten bederatzi igoaldi burutu zituen Aitor Galán oriotarrak eta bost aldiz igo zen Sandra Gulín ermuarrak. Partaide guztien artean ia 700 igoaldi egin ziren egun osoan zehar. Hurrengo erronka zergatik ez 791 joan-etorri egitea, Urkoren metroei erreparatuta?