Javi Alberdi Memoriala arrakastatsua izan zen

Estibalitz González 2024ko eka. 11a, 07:00

Zapatuan ospatu zen Javi Alberdi mendizalearen omenezko lehenengo Memorial Solidarioa eta, arrakastatsua izateaz gain, hunkigarria ere izan zen. Urko 12H NON STOP; 12 ordu gelditu barik. Goizeko 7etan hasi eta arratsaldeko 7ak arte, etenik gabe Urko mendiaren maldak aldapan gora zihoazen edo gailurretik behera zetozen herritarrez bete ziren. 

Argazkiak: Emilio Carral, Mikel Madarieta eta Iraia Aguirre.

Nahi beste aldiz igo zezaketen, behar zuten beste denbora erabiliz. Igotzen hasi aurretik bi euroren trukeko txartela eskuratuta, ehunka pertsonek ekin zioten 791 metrora dagoen gailurrera arteko ibilbide malkartsuari, gune batzuetan %30 desnibela ere hartzen duena. Artarrai eta Hiru Txikiak Trail taldeak antolatutako ekimen honen bitartez jasotako dirua SLC6A1 Spain elkartera eta Hugo M.D. ermuar gazteak bizi duen entzefalopatia epileptikoaren gaitzaren ikerketara bideratuko da.