Nazioarteko Sareak azaroaren 30ean ospatzen du Hiri Hezitzailearen Nazioarteko Eguna. Ermuko Udalak, ordea, bezperara pasa zuen aurtengo programazioa, sanandresetako Eibarko azokarekin bat egin ez zezan.
Horrela, ostiraleko arratsaldeko 17:00etatik aurrera, plazan antolatutako ekintza desberdinetan disfrutatzeko eta ikasteko aukera izan zuten Ermuko haurrek: Sukaldaritza ikastaroan, etxeko animaliak ondo zaintzen ikasteko tailerrean, eskulan musikalekin, eraikuntza jokoekin, ibilgailu ekologikoetan ibiltzeko txokoan, "eskuekin lurrean" lorezaintza tailerrean... Horrez gain, Ermua-Mallabia Oinarrizko Lanbide Heziketako institutuko Ile-apainketa eta estetika moduluko ikasleen bisita izan zuten, eta aurpegi, atzazkal eta maskara margoketa tailerra jaso zuten haien partetik.
