Bihar, hilak 30 (osteguna) egingo da bigarren eta azken entsegua Alboka musika eskolaren egoitzan 20.15etatik 21.30etara. Ohikoa den bezala, kantariek otsailaren 4an egingo dute herrian zeharreko kantu-jira eta erdiguneaz gain, Santa Ana, Santiago, Ongarai eta San Pelaio auzoak alaituko dituzte euren abestiekin, Albokako trikitilariez lagunduta. Irteera Abeletxe egoitzatik izango da, arratsaldeko 18.00etan.
Errepertorioa osatzen dute Santa martiriaren koplekin eta kantutegi tradizionaleko beste batzuekin ere, hala nola, Baldorba, Goizian argia hastian, Eperra, Bautista Basterretxe eta Xalbadorren heriotzean. Herritarren borondate onari esker ibilbidean zehar batzen den dirua aurreko urteetan bezala Kolonbiako Barranquilla hirira bidaliko da, bertan bizi den Mireya Suarez ermuarraren bitartez gertutik ezagutzen dituen familia zaurgarri eta behartsuenei laguntzeko.