Ermuko baserritarren ohitura zena kalera ekartzeko asmoz, Txitxiburduntzi eguna antolatu du Jubiletxeak aurrenekoz. Ostegun goizean zehar, bazkideentzako zein gainontzeko herritarrentzako ekintza pila prestatu dituzte eta, txapelketa eta jokoetan, txorizo tiketak eta otar potoloak irabazteko aukera egongo da.
Bi ibilaldi eta bisita gidatu bat
Goizean goiz, Aixolarako bidea hartuko dute Jubiletxetik. Bi ibilbide desberdin egingo dituzte: bata luzea (presara igo eta hari buelta eman) eta motza bestea, mugikortasun gutxiago dutentzako pentsatua (presara igo eta zuzenean jaitsi).
Bestela ere, mugikortasun urria duten lagunentzako herrigunean zehar egingo den paseotxoa egiteko aukera egongo da. Ermuko emakume talde batek gidatuko du eta antzinako Ermua nolakoa zen azaltzen joango dira kalez kale.
Txapelketa desberdinak
Ibilalditxoaren ostean, petankan, igelean eta tutean jokatzeko aukera egongo da. Igel-jokoa Martxoaren 8a plazan jarriko da eta tute txapelketa Jubiletxe barruan jokatuko da. Petanka eta igelaren irabazleek txorizo tiketak eskuratuko dituzte sari; tuteko irabazleek, berriz, ardo botila eta hestebete freskoz osatutako otarrak jasoko dituzte.
*Oharra: Gaur zen tutean izena emateko azken eguna, baina bihar goizera arte luzatuko da azkenean. Apuntatzeko, jo lehenbailehen Jubiletxeko bulegora.
Tiketak erosteko azken eguna
Bihar goizera arteko epea dago Txitxiburduntzi eguneko txorizoa erreserbatu ahal izateko. Tiketak jubiletxean bertan eskuratu daitezke; 2 euroan bazkideek, 4 euroan gainontzekoek. Ostegunean, tiketaren truke txorizoa eta makila emango zaie, eta Martxoaren 8a plazan erre ahalko dute. Ostean, ogia jasoko dute eta edateko ura edo ardoa izango dute aukeran.
Argazkia: Alpino Tabira.