Martxoaren 16an, zuhaitz landaketa egiteko irteera antolatu du Artarrai mendi taldeak. Zuhaitz Eguneko ohiko tokia aldatuko da aurtengo edizioan: Untzama gaineko basoan (Elorretako bidean) egingo da. Taldetik azaldu dutenez, sarbide "erraza eta erosoa" du eta irteerak 2-3 ordu inguru iraungo du guztira. Herritar guztiak gonbidatu dituzte domeka goizeko plan honetara gerturatzera:
"Mendizaleak eta natura babestu nahi dugunok (ume, gazte zein heldu) bat egingo dugu 200 haritz inguru landatzeko. Ekintza honen bidez zuhaitzek gizadiarentzat duten garrantzia nabarmendu eta natur guneak babestu beharraz herritarrak (umeak batez ere) kontzientziatu nahi ditugu. Kontuan izan behar dugu basoek gure planetan duten eragina, besteak beste: CO₂ isurketen aurka, negutegi efektuaren eraginean, basamortutze prozesuan, bioaniztasunari eustean, ur eta airearen kalitatearen kontrolean… Horregatik, etor zaitezte ekintza honetan parte hartzera!"
Domeka goizean elkartuko dira plazan, 10:00etan, eta bertatik abiatuko dira.
2024ko Zuhaitz Eguneko talde argazkia.