Erdiguneko txakur parkea lekualdatzeko lanak amaitzear

Ander Gomez 2025ko mar. 13a, 07:45

Aste hasieran ekin zioten Martxoaren 8a plaza alboko txakur parkea Izelaietako etxeen atzekaldeko berdegunera lekualdatzeko prozesua. Gaur eta bihar artean bukatuko dutela estimatu dute langileek, "betiere eguraldiaren arabera".

Txakur parke berria Emakumeen Etxetik (barne) hasi eta Irulitxa tabernaren hasieraraino ailegatuko da, 5 metroko tartea zainduta etxeen eta parkearen artean. Hiru sarrera izango ditu: bi tabernatik gertu (bata arrunta, bestea bi atekoa) eta azkena aldaparen hasieran egongo da, belar-metatik gertu.


Txakur parkearen lekualdatzea; marra txuriz parke zaharra, gorriz gune berria.

Geratzen den hesiaren zatia parke zaharreko egurrekin muntatuko dute. Prozesuaren parte hau "zailena" dela diote langileek, lursailaren egoera eta malda dela-eta, baina datozen egunotan amaituta egongo dela estimatu dute: "Aste honetan seguru; bihar edo etzi, eguraldia lagun izanez gero".


Txakur parke zaharra, pentanka pistaren atzean.