Txapelketa bikaina egin zenuen Sabadellen, altuera guztiak lehenengo saiakeran gaindituta. Zer nolako sentsazioak izan zenituen?
1,74 eta 1,76 metroak lehen saiakeran gainditu nituenean, harrituta geratu nintzen! 1,76rekin Espainiako txapelduna nintzen, nire marka 3 zentimetrotan hobetuta, zer gehiago eskatu nezakeen? Momentu hartan txapelketatik guztiz kanpo nengoen, deskontzentratuta, pozez zoratzen! Orain, aldiz, amorru apur bat daukat, ez nintzelako 1,78rekin gogoz saiatu. Izan ere, aurreko altuerak lehenengo saiakeran gainditzeak adierazten du gehiago saltatzeko gaitasuna duzula... baina tira, pausoz pauso.
Txapelketako lehen jauzia 1,59 metrotan jarri zenuen, gainontzeko lehiakideek 1,55 metrotan jarri zuten arren. Konfiantza handia zeneukan zure buruan?
Bueno, kontua da hobeto moldatzen naizela altuera handietan, txikietan baino, bestela erlaxatzen naiz eta aukera asko ditut listoia jotzeko. Dena den, banekien gauzak ondo egin ahal nituela, aurreko astean marka pertsonala zentimetro batean hobetu nuelako, baina ez irabazteko moduan!
Bazegoen faboritorik?
Bai, bigarrena geratu zena. Bere marka pertsonala 1,75 zen.
Txapelketa pista estalian izan zen, nahiago duzu hura ala aire zabaleko pista?
Aire zabala nahiago dut. Ez dut denbora asko izaten pista estalia prestatzeko... aurten bai, azterketak bukatu eta ia hilabete egon naizelako kalitatezko entrenamenduak egiten, baina ez da ohikoa. Bestalde, txapelketa itxura handiagoa hartzen diet aire zabalean egiten diren probei: espazio gehiago dago, beste giro bat...
Zeintzuk gauza landu dituzu aipatu dituzun entrenamendu horietan?
Serieak korrika, indarra, esplosibitatea, multisaltoak, karreraren teknika, listoiaren gaineko teknika... Baina asko entrenatu arren, oinarrizko gauza dago txapelketetan ondo aritzeko: burua ondo izatea.
Lolo Garcia entrenatzailea ondoan izan zenuen txapelketan. Horrek mesede egin zizun?
Bai, noski! Ezinbestekoa da! Entrenatzaileak ez dizu erakusten bakarrik saltoak egiten: ondo ezagutzen zaitu eta badaki zehazki zer gauza esan behar dizkizun zuk ondo ulertzeko eta hobetzeko, bai entrenamenduetan bai txapelketetan ere. Nik Lehen Hezkuntzako 3. mailatik entrenatzen dut Lolorekin eta asko hitz egiten dugu. Gainera badakit ahalegin handiak egiten dituela niri horrenbeste denbora eskaintzeko, aita delako, atletismo taldea entrenatzen duelako, bere bizitza duelako... Denbora asko daramagu elkarrekin eta espero dut denbora askoz gehiago egotea nire ondoan.
Zer ezaugarri izan behar ditu gorako jauzilari batek?
Estereotipoak apurtzeko daude, baina garrantzitsua da altua eta arina izatea, eta alde horretatik nire fisikoa egokia izan daiteke, 1,81 neurtzen dudalako eta fina naizelako. Lagungarria izan daiteke baita ere hanka luzeak izatea eta lasterketari ona izatea.
Yaroslava Mahuchikh ukrainarrak du munduko errekorra gorako jauzian: 2,10 metro. Zer diozu bere markaz?
Urrun, gaur-gaurkoz oso urrun ikusten dut! Gure aurtengo erronka da 1,80ra heltzea, uztailean Europako Txapelketan parte hartu ahal izateko.
Zure entrenamenduak umeen entrenamenduekin tartekatu beharko dituzu, aurten Lehen Hezkuntzako umeak entrenatzen hasi zarelako. Zein aholku ematen diezu?
Gozatu behar dutela esaten diet, eta denetik probatu: krosak, saltoak... Horrek guztiak diziplina erakusten du. Nik ere, atzera bueltatuko banintz, ez nuke bakarrik gorako jauzia egingo, konbinatua egingo nuke. Kontua da eskubaloia ere egin izan dudala betidanik, eta ezin nuen entrenamendu gehiago egin.
Gaur egun ere eskubaloian jokatzen jarraitzen duzu?
Bai, atletismoaren eta eskubaloiaren artean aukeratu ezinik nabil...
Zein da atletismoaren egoera Euskal Herrian?
Esango nuke egoera ez dela txarra, baina ez zait bidezkoa iruditzen maila profesionalean dabiltzan atletek ez kotizatzea. Beste kirol batzuetako maila gorenetan, adibidez eskubaloian, kotizatzen dute.
Nola ikusten duzu zure etorkizuna?
Jarduera Fisikoaren eta Kirolaren Zientzietako eta Lehen Hezkuntzako Gradu bikoitza egiten ari naiz. Kirolari dagokionez, espero dut etorkizunean kirol batean bakarrik aritzea eta, atletismoan bada, nahi nuke hobetzen jarraitu, gozatu, eta Europa mailako txapelketa batean parte hartu, bada garaia-eta!