Pedalmetal enduro taldeak antolatu du Ermuko lehen downhill lasterketa: Ultzamatik Santa Anarako bizikleta jaitsiera. Uztailaren 20an jokatuko da, 10:00etatik 14:00etara bitartean, eta bezperan zirkuitua ezagutzeko entrenamenduak egongo dira arratsaldez, 14:00etatik 19:00etara. Horrez gain, asteburu honetan aparteko entrenamendua egingo dute, Bizkaiko Txirrindularitza Federazioarekin batera antolatua. Igandean izango da (hilaren 6an) eta 30 plaza daude bakarrik.
Zirkuitua txukuntzeko lanetan dihardute egunotan. Argazkiak: Pedalmetal.
Federatuta daudenek 5 euroan eskuratu dezakete plaza; gainontzekoek, 19 euro ordaindu beharko dituzte: 12 euro plaza erreserbatzeko eta 7 euro derrigorrezko istripu-asegururako. Erreserbak barne hartzen ditu Bizkaiko Federazioaren erremonte-zerbitzua, oinezkoak zirkuitura ez sartzeko seinalizazioa, entrenamendu-txandak kudeatuko dituzten antolakuntzako langileen jarduna eta bukaerako anoa-puntua (solido eta likidoa). Interesa dutenek izena eman dezakete formularioa beteta.