Haur Kontseiluko kideek gidatuta, koloretako hautsekin bete dute plaza ermuar gaztetxoenek (txupinazoa argazkitan ikusteko egin klik hemen). Jarraian, ur-parkea eta tailerrak ireki dituzte eta 13:30ak arte egongo dira; baina bazkalostean berriro ere zabalduko dituzte, 16:00etatik 19:00etara. Ordu berean buruhandiak irtengo dira kalera eta, korrikalditxoa egin ostean, txokolatea jateko parada izango dute umeek, 17:30ean, plazan bertan.
Baina festa ez da hor bukatuko: 19:00etan, haurrentzako disko-festari ekingo diote, Lorea Intxausti eta Joanes Echevesteren eskutik; 20:30ean, berriro ere bainujantzia eta uretako betaurrekoak hartu beharko dituzte, apar jaian murgildu nahi badute; eta 22:00etatik 01:00era, Martxoaren 8a plazan, Txurru Dj-aren "Festan Blai" jaialdia izango dute, oraindik indarrik izanez gero, eguna dantzan amaitzeko.
