Atzo, urriaren 29an, Ermuan izan ziren Eneko Pou (Gasteiz, 1974) eta Iker Pou (Gasteiz, 1977) goi-mailako eskalatzaile eta alpinistak. Artarraik antolatu zuen hitzordua eta herriko zein inguruko mendizalez bete zuten Lobiano Kulturguneko ikus-entzunezko gela.
"Lau elementuen erronka" diaporama aurkeztu zuten arabarrek, munduan zehar (Himalaian, Santo Tomen, Andeetan...) egin dituzten ibilaldi eta eskaladak erakutsiz.
Ikusleak mutu uzteko bezalako irudiak erakutsi zituzten arren, aurkezpena bukatzean bertaratutakoekin berba egiteko eta euren galderak erantzuteko tartetxoa hartu zuten.
Iazko azaroan argitaratutako liburu izenkidearen aurkezpentxoa ere egin zuten. Ale batzuk ekarri zituzten, eta berauek eta aurretik kaleratutako "Aupa Pou" liburuak sinatzeko tartea hartu zuten. Artarraiko kideentzako alea dedikatzean, "beste 50 urte" opa zizkioten taldeari.
