Euskalmetek gaur, 12:50ean, egindako iragarpen ofizialaren arabera, zaparrada txikiak espero dira San Martin azoka eguneko goizean zehar, ostarteekin tartekatuta. Arratsaldetik aurrera, atertuz joango da eta hodeiak gutxituz joango dira. Orokorrean, ipar-mendebaldeko haizea ibiliko da. Tenperaturak 9ºC eta 13ºC artekoak izango dira; azoka irekieran 11ºC inguruko tenperatura izango da, eta maximoak 14:00etan espero dira.
Egitarauak aurreikusi bezala egingo du aurrera
Euskal Birusa Elkarteko antolatzaileek jakinarazi dutenez, Martxoaren 8a plazako herri-kirol erakustaldiak euria eginda ere burutuko dira. Era berean, dantza erakustaldiak egingo dituzte, plazako aterpean bada ere. Gainontzean, herritarrek eta bisitariek azokako postuak izango dituzte aterpe, fruta, barazkiak, ogia, eztia, gazta, sagardoa, txakolina, gozoak... eta artisauen lan ederrak ikusi eta erosteko aukerarekin.
