EMOEk hasi du dagoeneko gabonetako kanpaina. Ohiko txokolatadarekin iragarri zuten aurrerantzean herritarrek deskontu eta eskaintza bereziak izango dituztela, baita zozketak (paleta iberikoarena abenduaren 19an, adibidez), ikastaroak (Txiki-Txef abenduaren 20an), lehiaketak (apaindutako balkoiena abenduaren 22an) eta bestelako sorpresak ere.
Argazkia: EMOE.
Bestalde, arratsalde osoan zehar, domekan ospatuko den Hiri Hezitzaileen Nazioartearen Egunaren baitako jolasak egon ziren plazan, 2 eta 12 urte bitarteko umeentzat: aurpegiak eta poltsak margotzeko tailerrak, eraikuntza gunea, "dibertxokeak", trafiko seinaleak ikasteko kart zirkuitua... guztiak Ermua BHIko ikasleek zaintzapean.
Argazkia: Dorleta Vidal.
Ondoren, gabonetako argiak piztu zituzten. Udalak 300 elementutik gora jarri ditu udalerriko 160 gunetan; tartean, Ermuko sarreran eta plazako kioskoan "Zorionak" dioten argiak eta zortzi metroko gabonetako zuhaitza. Iaz bezala, Argilinex enpresa mungiarrak jarri ditu apaingarriak, baina udalarekin sinatutako kontratuan jaso bezala, gutxienez jarritako elementuen %20 berriak dira. Udaletik azaldu dutenez, "guztiak kontsumo baxuko LED argiak" dira, urtarrilaren 7ra arte egongo dira piztuta eta, tarte honetan, argindarraren gastua "ehunka euro batzukoa" izango da guztira.
Argazkia: Dorleta Vidal.