Beatriz Gamiz alkateak 2026rako aurrekontuen zirriborroa aurkeztu zuen atzo, pleno aretoan, José Manuel López, Arritokieta Araiztegi eta Mikel Cantero alkateordeekin batera egindako agerraldian.
Aurrekontua hurrengo puntuetara bideratzea proposatzen dute: 9,7 milioi euro udal langileen soldatetara; 9,3 milioi euro zerbitzuetara, mantentze- eta hobekuntza-lanetara, eta tokiko enpresa txikien laguntzara; 3,4 milioi euro gizarte-babesera (gizarte zerbitzuak, mendekotasun-arreta, berdintasuna, haurtzaroa, immigrazioa, enplegua eta etxebizitza); eta 2,09 milioi euro inbertsio publikora (%76 gehiago aurtengoekin alderatuta), Bide Berdea, Merkatu Plazaren birgaitzea eta argitera publikoaren hobekuntza finantzatzeko. Eusko Jaurlaritzarekin eta Aldundiarekin batera ere proiektu desberdinak egingo dira, hala nola: espazio komunitarioen birgaitzea, digitalizazioa, kirol eta gizarte ekipamenduak eta energia efizientziaren hobekuntza.
Horrez gain, "Ermuak erabakitzen du" partaidetza prozesuan herritarren esku utzitako aurrekontuaren %1a —250.000 euroan estimatu zena— erabiliko da gazteentzako chill-out guneak sortzeko, abuztuko aire zabaleko zinema urte osora zabaltzeko, bideojoko eta robotika tailerrak antolatzeko, Valerio terraza berritzeko, eta Errekaldeko igerileku naturala berreskuratzeko (albistea hemen).
Aurrekontu hau udal-gobernu taldeak bultzatzen dituen proiektu estrategikoekin bat egiten duela azaldu zuen alkateak, "Ermua berdinzale eta inklusiboa lortzeko bidean; jasangarria, digitala eta modernoa izango dena; bere industria-identitatea eta ehun produktiboa zainduko dituena; eta pertsonak erdigunean jartzen dituena".