Euskara ikasi, hobetu eta praktikatu nahi dutenek zabalik dituzte Kaltxango AEK euskaltegiko ateak. Irakasleok haien bidelagun izan nahi dugu, ikas-prozesu erosoa izan dezaten, etxean bezala senti daitezen.
Ordutegi, modulazio... malguak eskaintzen ditugu ikasleen beharrizanetara egokituak. Online, autoikaskuntza eta aurrez aurreko eskolez gain, erabilerarako aukerak ere eskaintzen ditugu: AIZU! aldizkaria, euskaraz irakurtzeko; Berbalagun, mintzapraktika giro atseginean egiteko...
Horrez gain, A1 mailarako diru laguntza berria azpimarratu nahi dugu; doakotasunaren bidean beste urrats bat, eta pizgarria euskaratik urrun bizi direnentzat. Euskara 0tik ikasi nahi duten ikasleen matrikula merkeagoa izango da hemendik aurrera. Ildo beretik, aurten ere badago 16-18 urte bitartekoentzat C1 maila prestatzeko diru laguntza. Maila horretan ere matrikula merkea izango dute ikasleek. Oro har, edozein mailatako ikasle guztiek % 100era arteko diru laguntza jasotzeko aukera izango dute.
Izena emateko, Kaltxango AEK euskaltegiak ateak zabalik izango ditu astelehenetik ostiralera. Goizez, 9:00etatik 13:00etara, eta, arratsaldez, 16:30etik 19:30era. Izena emateko azken eguna irailaren 25a da.
Animatu eta hurbildu euskaltegira!