Metro batzuetara plazan bertan zegoen Eskola Txikixa deitutako parbularioa; Jesusa Uriarte eta Florentina Makibar zeuden irakasle lanetan. “Padre Nuestro que estás en los cielos…” kantatzen zuten ume guztiak batera, maistrok asmatutako doinu berezi batekin, eta orduan ikasi zutenek melodia harekin gogoratuko zuten betirako.
Eskola eraikinak azpian arkupea zuen, eurirako aterpe eta estimazio handiko lekua pilotan egiteko. Tailerretako behargin gazteen ardura izaten zen, eguerdiko tartean, harrapatika baten bazkaldu eta bizkor-bizkor lekua hartzera joatea. Pilota ekinalditxo bat egin eta izerdi-izerditan berriro lanera!