Ermua Palestinarekin Ekimenak uste du urtarrilaren 19an indarrean sartu zen su-etena lasaigarria dela palestinarrentzat, 15 hilabetez etengabe bonbardaketak jasan eta 47.000 pertsona baino gehiago hil eta Gazako eskualde osoa erabat suntsituta utzi ondoren.
Badakigu egoera berri hau hain agerikoa ez den genozidio modu baten jarraipena izan daitekeela, eta Israelek eta Estatu Batuek espero dute eskualdeko eta munduko sumindura gutxiago eragitea. Horrexegatik, hain zuzen ere, kalera ateratzen jarraitu behar dugu mundu osoan, palestinar herriari laguntzeko eta gure agintariei behingoz Israelen aurkako benetako presio-neurriak har ditzatela eskatzeko. Genozidioak jarrai ez dezan, gizarte zibilak zigor ekonomikoak ezartzea eta Israelekin mota guztietako harremanak haustea exijitu behar dugu.