SEADen Lagunen Elkarteak Maria Rosario partaide zuen Ermuko Emakumeen Asanbladari Saharako Emakumeen Batasun Nazionalaren eskutik jasotako plaka bat eman zion, iaz Tindufeko errefuxiatuen kanpamentuetan ekintzaile ermuarraren omenez egindako beste ekitaldi batean emakume sahararrek eskainitako oroigarria, hain zuzen.
Omenaldi honetan, Maria Rosario Arrizabalagak 2021ean hil zen arte saharar herriaren alde egin zuen lana goraipatu zen, eta bereziki nabarmendu zen errefuxiatuen kanpalekuetan emakumeen etxeen sare bat sortzeko bere ekimena eta bultzada erabakigarria.
Ermuko Emakumeen Asanbladako ordezkariak ekitaldian azpimarratu zuenez, "Mariarrok bizitzan zehar izan zituen borroka ugarien artean, ziurrenik bi izan ziren oraindik ere grina handiagoarekin sentitu zituenak, feminismoa eta Sahara, eta biak bat egiten dute saharar emakumeen etxeen proiektu honetan".
