Maiatzaren 15etik 25era bitartean burutuko dira aurtengo Euskaraldia eta Ermuan Bagara egitasmoak, eta Ermuko Euskaltzaleen Sarea hasita dago jada prestaketa lanetan. Ekintza hauen helburua da hamaika egun horietan euskara nagusi izatea herritarren ahoan, eta baita herriko kaleetan ere, talde eta elkarte ezberdinek antolatuko dituzten kultur eta kirol ekintzei esker.
Horrekin lotuta, lehen ekitaldi publikoa egingo da martxoaren 15ean, Sagardo Egunean. Izan ere, "hamaikakoa" aurkeztuko da, hau da, Euskaraldiak iraungo duen egun bakoitzeko herriko ordezkari bat aukeratu da, eta guztien artean osatzen duten taldetxoa arduratuko da baita ere txotx egiteaz. Gainera, Euskaraldian izena emateko aukera egongo da egun horretan.
Norbanakoen izen emateaz gain, entitateena ere zabalik dago eta aurtengo edizioan, entitate guztiei gonbidatzen zaie Euskaraldian parte hartzera. Horretan izena emateko zein ekintzari buruzko informazio gehigarria lortzeko euskaraldia.eus webgunera jo daiteke. Entitateek parte hartzeko oinarrizko eskakizunak honakoak izango dira:
- Entitateko kideei Euskaraldiaren berri eman eta kideak ahobizi eta belarriprest izan daitezen gonbidatzea.
- Ariketa ondo egiteko eta rolean eroso egon daitezen prestakuntza tresnak aztertu eta kideekin partekatzea.
- Ariketan parte hartzen dutela ikusgarri egin (txapa jantzi, barne eta kanpo komunikazioa, espazioak apaindu, eta abar).
Bestalde, Euskaltzaleen Sareko koordinatzailea den Oier Beitiak jakinarazi duenez, Euskaraldiaren "Gune ibiltaria" martxoaren 21ean izango da Ermuan. Furgoneta hau Euskal Herriko herri ezberdinetan egongo da Euskaraldia hasi arte, eta bertara gerturatzen direnek egitasmo horrekin lotutako informazioa jaso ahal izango dute, hala nola izena eman eta edizio honetako produktu ezberdinak probatu eta erosi.