Panorama aldaketa argia da. Ez gara gure senarren beharrak asetzeko bizi ezta zaintza lanak automatikoki gure gain eta inork aitortu gabe asumitzeko prest gaudenak. Horregatik jarri genuen krisian kapitalaren “paradisua” zeinak produkziorako lego piezak ondo kokatuta zituen eta horregatik jauzi egin genuen ikusgarria eta aitortua den lan merkatura eta horrela gabiltza, arnasestuka, sistemak guretzat tokirik ez daukan honetan. Guri lego piezarik inork esleitu ez digunean.
Panorama aldaketa argia da. Gure jokoaren arauak aldatu ditugu jolasteko piezak aldatu gabe. Bizimoduak aldatu ditugu bizirauteko baldintzak aldatu gabe: diruaren behar hutsak eta dena niretzako, nire txakurra, nire etxea, nire alaba, nire estresa … atzean utzi nahi izan duguna orainean ere gurekin dagoelako. Gu gara gaur egun ere aiton-amonak zaintzen ditugunak, edota haurrren zainketan burubelarri gabiltzanak, edota mahaia jasotzen dutenak bilera baten ostean. “Nire ustez” eta “esango nuke” esaten dutenak eta “parkatu” eta “mesedez”.
Panomara zertxobait aldatu da guretzat. Ezer gutxi ondokoarentzat, gure txuritasunak gainditu barik, ondoan egonda ere urruntzen ditugun horientzat. Gure beharrak asetzeko bizi eta automatikoki haien gain eta inork aitortu gabe zaintza lanak asumitzen dituzten horientzat. Normalean gure herrialdeetara migratuak, haiena sostengatzeko gurea zaintzea besterik ez dutelako. Eta zenbat kostatzen zaigun begirada hona zuzentzea.
Eta panorama aldatu dela baino aldatu beharko litzatekela esaten dugu gure lankide gizonaz ari garenean, edo gure osabaz, edo kuadrillako lagun horretaz, edo gure mutilagunaz. Martxoaren 8an atzeko lanetan laguntzen ari den horretaz, lagunekin mutilen WhatsApp taldean jarraitzen baitu meme eta sticker misoginoak legitimatzen. Ander, Asier, Mikel, Josu, Aitor … bazabiltzate zerbaitetan baina lan handia daukazue aurretik Mugimendu Feministak hamarkadetan zehar egin dituen lanketak parekatzeko. Baina bazabiltzate horretan eta beraz, gutxikinaka baina panorama aldatzen ari dela esango dugu gaurkoan.
Panorama ez da aldatu aldiz, gure herriaren beharrak entzun eta erantzun beharko luketen horietan. Instituzioetan. Jaun-andreak, Berdintasun Ordenantza berria daukagu gurean, berria zerbait esatearren. Izan ere, ez dira gure gogokoak lerro goibel hauetan aipatzen diren artikulu hutsalak, ezta Emakumearen Etxeko barne funtzionamendurako arauak ezta Berdintasun Kontseiluaren jarduteko modua eta esleitutako erabakiak. Baina zer esan, esanda ez dagoenik … panorama ez da aldatu ez, orain dela 9 urte alegazioeen aurrean isiltasun konplize bat entzun genuen eta zer esan, esanda ez dagoenik. Beraz, ez, panorama ez da ezertxo ere aldatu boteredunen etxean.
Eta zelako panorama! esaten dugu teleberria ikusi eta hotzikara batek goitik behera zeharkatzen gaituenean. Aspaldian irabazitakoak kolokan ikusten ditugu eta gu gaurkotasunarekin talkan. Kontrabotereak sortzen, alternatibak eraikitzen eta arrazoiak gidatutako gudan, zoroen pare. Beste emakume bat erail dutela diote EITBko platoan, eta eraso homofoboa Euskadi Irratian eta pertsona migratuak jo puntuan jartzen dituen gorriz tindatutako orri zuria Ermuko Abiapuntun. Eskuinera begiratu eskero, dena da amorrua.
Ezin daitezke laburbildu inguratzen gaituen panorama honetan pil-pilean ditugun kontuak. Konturatzen gara ordea, ez gara ameslari inozoak, feministak baizik. Amesgileak gara, ametsen bidea egin egiten dugu eta ez zaiola inori okurritu gure erremintak eta lan-indarra gutxiestea. Gutxietsi baino, ezkutatu nahian dabiltza Mugimendu Feministak urteetan zehar erdietsi dituen gailurrak. Baina ez gara inozoak, gurekin jai daukate, izan ere feministak gara. Eta luzez izango gara feministak.
Faxismoaren aurrean, ausardia feminista!
Gora borroka feminista!