Bizkaian eta EAEn gizonezko langabeen kopurua apur bat jaitsi den arren (%0,6 eta %0,1 gutxiago, hurrenez hurren), Mallabian %50ean igo da. Hala ere, emakume langabeen kolektiboak gehiago izaten jarraitzen du: 21 gizon langabeturekin itxi da 2024a; emakumeek kopuru horrekin itxi zuten 2023a eta orain 26 dira (%23,5eko igoera).
Adinari erreparatuta, 44 urtetik gorakoak dira nagusi eta nabarmen igo da kopurua 2023koarekin alderatuta: 24tik 38 izatera pasa dira. Jaitsiera bakarra 35-44 bitarteko emakumeen artean eman da, bostetik bakarra izatera pasata.
Zerbitzuen sektorean eman da gorakada handiena: bai pribatuan, bai zerbitzu publiko eta osasun-zerbitzuetan, %200ean igo da langabezia. Komertzio eta ostalaritzaren sektorean, aldiz, %33an jaitsi da. Hala ere, langabe kopuru gehien izaten jarraitzen dute tekniko-administratiboen sektoreak eta industriak —azken honetan apur bat jaitsi den arren 2023arekin alderatuta—.
