400 parte-hartzaile izan zituen AEPUZZen aldibereko lehiaketa solidarioak. Ermuko egoitzan 52 lagunek hartu zuten parte, herritarrak zein kanpotik gerturatutakoak: Bilbotik, Donostitik, Gasteiztik... baina baita Soria, Valladolid edo Kantabria aldetik ere. Merkatu plazan eman zuten goiza hegazti exotikoen 500 piezako puzzlea osatzen (goiko galeriako 2. argazkian ikusgai). Bukatzean, partaide eta laguntzaile guztiek batera bazkaldu zuten bertan.
Lau zero batzera ailegatu ziren
Egoitza fisikoetan parte hartuz lagundu zutenez gain, online parte-hartzeko aukera ere egon zen, "0. lerroko" modalitatean. Horrela, egoitzetara fisikoki gerturatu ezin zutenek online konektatuta jokatu eta bere harri-koskorra jarri ahal izan zuten etxetik bertatik.
Ermuan, errifa solidarioa soilik kontuan hartuta —txartel bakoitzak euro bateko kostua zeukalarik— 241 euro bildu ziren; baina, lehiaketa osoari dagokionez, 10.000 eurotik gora batzea lortu zen. Diru guztia DANAren kaltetuei laguntzeko bideratuko da.
Sari-banaketa
Ermuko hiru bikote azkarrenek garaikurra eta puzzlea eraman zuten sari:
- 1. postua: Sonia eta Alba Alonso Dios (Valladolid), 51m 29s.
- 2. postua: Itziar Guillerna Fernández (Bilbo) eta Daiana Soria Ippoliti (Soria), 54m 25s.
- 3. postua: Maddi Bilbao Urbistondo eta Ane Aburruza Ucar (Donostia), 58m 33s.
Gainontzeko partaideek ordu batetik gorako markak egin zituzten. Ermuar azkarrenak Juan Luis Morente Palomo eta Miren Morente Segura izan ziren (1h 25 m 47s).
Jarraian, sari-banaketako irudiak (hiru bikote garaileak eta zozketako irabazleetako batzuk):
Argazkiak: Raul Pelayo.
