Euskal Birusa elkarteak Ahunki estudio durangarraren esku utzi zuen iazko San Juan suaren bideoa egiteko ardura. Ikus-entzunezkoen ekipo profesionalarekin grabatu zuten eta akelarreak iraun zituen 21 minutuak jasotzen ditu bideoak. Bi aste atzera egin zuten estraineko proiekzioa, Lobianon.
Aurkezpenean, Txindurriko kideek akelarrearen inguruan egiten ari diren hausnarketaz jardun zuten, erakustaldi ikusgarriago bat eskaintzeko ohiko proposamenez gain, akelarreak islatzen duen iruditeria apur bat gehiago zaintze aldera. Hilabete eskas falta da aurtengo San Juan surako eta, Txindurriko lagunek agindu zutenez, gauza berriak datoz...
Txindurriko kide Josu Gomez eta Peio Lopez aurkezpena egiten. Argazkia: Nora Gaston.
Euskal Birusa elkartetik jakinarazi dutenez, bideoa Ermuko ikastetxe guztietara zabaldu dute eta datozen egunotan proiekzioak egingo dituzte txikienentzat.
