Domeka honetan sei urte beteko dira Javi Alberdi ermuarra mendiko istripu batean hil zela. Bezperan, maiatzaren 31n, bere omenezko memorial solidarioaren bigarren edizioa burutuko da, Artarrai Mendi Taldeak eta Hiru Txikiak Trail Taldeak antolatuta.
Funtzionamendua lehenengo edizioaren berbera izango da: tiket solidarioak plazan egongo dira salgai; atzekaldean izen-abizenak eta telefono zenbakia apuntatu beharko dira; eta, Urkora igotzean, tontorrean ipinitako postontzian sartu. Partaideek nahi beste igoera egin ahalko dituzte 07:00etatik 19:00etara bitartean, edo memorialaren lemak dioen bezala: 12h non-stop.
06:30 Tiket mahaien irekiera
Tiket solidarioak 2 euroan egongo dira salgai plazan.
06:45 Aurkezpen ofiziala
Lehen igoeraren aurretik, bigarren edizioaren aurkezpena egingo dute, eguneko programazioa gogoratuz eta azken orduko aldaketarik balego, horiek jakinaraziz.
07:00 Lehen igoera
Hiru Txikiak Trail taldeko kideek egingo dute lehen igoera, baina edozein partaide batu ahalko da.
09:00 Igoera Txikia
Ume eta gaztetxoen igoera, naturaz eta mugikortasun urriko pertsonen egoeraz kontzientziatzeko.
10:00 Mugikortasun urriko pertsonen igoera
Bi gazte ermuarrek eta beste bi arrasatearrek hartu dute Urkora igotzeko erronka. Aulki berezietan eta laguntzaileekin egingo dute igoera.
10:30 Javi Alberdiri omenaldia
Igoeran geldiunetxoa egingo dute Javi Alberdiren omenez landatutako zuhaitzean, lore-sorta eskaintza egin eta testu bat irakurtzera.
12:00 Tontorrera iritsiera (MUP)
Eguerdi aldera ailegatuko dira mugikortasun urriko pertsonak Urkora.
14:00 Harrera plazan (MUP)
"Ermua Kulturarteko Herria" festaren baitan (egitaraua hemen) batukada doinuekin hartuko dituzte plazan.
15:00 Bazkaria
Memorial Solidarioan lagunduko duten boluntarioek bazkaria egingo dute.
17:45 Azken irteerak
Tiket solidarioak erosteko azken aukera emango dute.18:30 Tontorreko postontziaren hustuketa
Urko puntako postontzia zabaldu eta tiket guztiak jasoko dituzte.
19:00 Tiketen eta dohaintzen zenbaketa
Iaz batutakoa SLC6A1 Spain elkarteari emango zitzaion, Hugo M.D. ermuarrak duen SLC6A1 geneari lotutako entzefalopia epileptikoa ikertzen laguntzeko. Aurtengo dirua Durangaldeko Rio de Oro elkartera bideratuko da, saharar herriari laguntzeko.
19:30 Sari banaketa eta amaiera ekitaldia
Igoera gehien lortzen dituztenek sariak jasoko dituzte.
Iaz, Aitor Galan oriotarrak 9 igoeratan utzi zuen gizonezkoen marka; Sandra Gulin ermuarrak 5 igoeratan emakumezkoena. Antolakuntzatik, 791 igoeren erronkarekin batera, bi marka hauek hobetzeko erronka luzatu diete herritarrei.
