ARTARRAI 50. URTEURRENA

Hiru ermuar Kilimanjaron

Artarrai Mendi Taldea 2025eko azaroaren 5a

Ricardo Gonzalez Izarra "Riki" (28 urte), Javier Garitagoitia Ostolaza "Katxan" (28 urte) eta Jesus Garaikoetxea Altube "Txus" (40 urte).

Artarrai Mendi Taldearen 50 urteak ospatzeko egitarauaren baitan, "Kilimanjaro 1976. Hiru Ermuar Afrikako Tontorrean" hitzaldia eskaini zen atzo, Lobiano Kulturgunean. Ricardo Gonzalez Izarra “Riki” mendizaleak, lehen pertsonan kontatu zuen hirurogeita hamarreko hamarkadan Afrikako mendirik garaienera egindako igoeraren abentura.

1976ko uztailaren 26an, hiru lagun abiatu ziren Ermutik Afrikako kontinentera, bertako gailurrik altuenera —Kilimanjaro mendira— iristeko asmoz.

Kenya zeharkatu eta Tanzaniako muga pasatu ondoren, Kilimanjaro Parke Nazionalera iritsi ziren. Han, Marangu ibilbidea jarraituz igoera hasi zuten, Mandara, Horombo eta Kibo kanpamenduetan geldialdiak eginez.

Abuztuaren 3ko goizean, Afrikako gailurrik garaienera iritsi ziren, Uhuru Point-era (Kilimanjaro), eta han ikurriña lotu zuten bertan zegoen plaka metaliko baten ondoan.