Indalezio Ojanguren argazkilariak ateratako erretratu honetan, ermita inguratuz oraindik gazte ikusten diren pinuak tantai itzelak egin ziren eta haizete gogor batek den-denak bota zituen. Erreteila berria egin zitzaion orduantxe, barrua berriztatu eta ingurua lautu.
San Migel Goiaingeruaren gurtzarako eraikia, Osma auzoaren parajeetan kokatuta dago. Herritarrek San Migel Txiki legez ezagutzen dute eta bertako jaia maiatzaren 8an ospatzen da, meza eta haren osteko luntxarekin. Sasoi baten erromeria, dantza-sueltoko txapelketak, bola-jokoa eta abarrak egoten baziren ere, berrogei bat urte izango dira meza bueltaren apartekotik ezer gutxi egiten dela bertan.