1928

Leona Apoita buruko zapiarekin

Erabiltzailearen aurpegia Aspaldiko argazkiak 2025ko ots. 23a, 09:15

Mallabia, 1928.

Bakarkako erretratu hau Pedro Jose Apoita Lexartzabururen eta Maria Margarita Mendibe Olearen Leona alabarena da, Ziortza-Bolibarko Arta auzoan 1892ko ekainean jaio eta gerora Geriako Urizar (Uzar) baserrian biziko zena. Auzokide batekin ezkondu zen San Adrianeko parrokian 1920ko apirilean, Longa Nagusiko Juan Francisco Antxia Basterretxearekin hain zuzen eta bertan biziko ziren aurrerantzean.

Sei seme-alaben guraso izan ziren: Elias, Justina, Jose, Gregorio, Bernarda eta Miren. Etxe bueltan beti topatzen zuen zereginen bat, ortuaren eta etxabereen karguaz tartekatzen zuena. Eguna zabaldu orduko esne eta ortuariz bete astoa eta txaka-txaka Durangoko merkatura joaten zen, auzoko beste batzuekin aldran. Orduko denboretan erlojurik ez eta goizean-goiz esnatzeko bezperan txiza egin barik joaten ziren ohera, txizalarriak esnatu eta sasoiz jagi ahal izateko. Longa Nagusin hil zen Leona, 1966ko uztailean.