Mallabiko Bitoita Gainekoa baserrira ezkondu zen bertako alaba zen Juana Otalora Ansotegirekin eta soinean ekarri zuen musikarako zaletasuna. Kantatzea demasean gustatzen zitzaion eta Parrokiako koruan abesten zuen. Gainera ohiko bihurtu zitzaien auzokoei Celestinoren akordeoi musikak entzutea behiak larrera bota eta bera ganaduzainen zegoenen. Ekinaldirik luze eta jakinena domeka goizetakoa izaten zen: euren etxaurreko jarlekuan paratu, soinuari hauspoaldi batzuk eragin eta mezetara orduko ekinalditxoa egitea gustatzen zitzaion.
Irratian jartzen zituzten piezen artean bere gustuko bat entzuten zuenean, soinua hartu eta melodiaren notak ateratzen hasten zen. Apurka-apurka eta ekinaren ekinez beti lortzen zuen airea ematea kantuari. Habanerak, pasodobleak… dantza loturako kantu asko joten zituen eta baita Tropikoko usain eta erritmo biziak gogoratzen dituzten “Moliendo café” bezalako abesti alaiak. Gabonetan, Andramarixetan, jaiegun handietan… soinua eta berau jotzeko gogoa, aldean beti Celestinok! 1977an hil zen, Bittoitten.