"Go!azen" telesailaren denboraldi berria estreinatzear da eta "nobedadez beteta" datorrela jakinarazi dute EITB-tik: "Aurtengoan ere Basakabiko gaztetxoen abenturez gozatzeko aukera izango da, betiko osagaiak nahastuta: lagunen arteko harremanak, amodiozko istorioak, misterioak, umorea… eta, jakina, musika eta dantza ez dira faltako. Ez ahaztu, eginagatik distira, denak urre ez dira!".
"Altxor Ezkutua" Mallabian
Azaroaren 22tik aurrera ikusi ahalko dira atal berriak ETB1 katean nahiz eitb.eus atarian —segidan, Makusi eta Nahieran plataformetan ere bai— baina, lehenago, "Altxor Ezkutua" izeneko atalaren aurrestreinaldiaz gozatzeko aukera izango da Euskal Herriko hainbat herritan, tartean, Mallabian:
- Azaroaren 17ean (domekan) proiektatuko da lehenengo atal hori, 16:00etan, Kontzejuzarrean.
Aurtengo denboraldiaren bideoklipa, "Bizitza Zukutu".
UEMA eta ETBren arteko hitzarmena
UEMAko koordinatzaile Miren Segurolak azaldu duenez, "gabezia" batean du jatorria UEMAk eta EITBk sinatu duten hitzarmenak. "UEMAren helburuetako bat da gure herrietan euskarazko ikus-entzunezkoekin dagoen gabeziari aurre egiteko bidea urratzea. Lanketa horri erantzunez dator ETBrekin hitzarmena, haiek ere horretan ari baitira", azaldu du. Go!azen telesaila aurrez estreinatzea hitzarmenean jasotako "lehen eskaintza" izango da, baina ez bakarra, Irabazi arte telesailen atalak ere estreinatuko baitituzte herrietan.
Herrietako umeek eta gazteek telebista euskaraz ikusteko aukera izatea garrantzitsua dela esan du Segurolak, eta nabarmendu du "behar-beharrezkoa" dela eskaintza bermatzeko baliabideak jartzea: "Pantailetan ere euskarazko eskaintzea izatea behar-beharrezkoa da. Horrela, lagun artean euskaraz ikusi eta euskaraz gozatzeko aukera izango baitute gazteek".