Azaroaren lehenean kaleratu zuen IZAROk gabon-kantez osatuta egongo den diskoaren lehen aurrerapen kanta —"Gure gabon kanta", hemen entzungai— eta gaur, hilaren 15ean, bigarrena kaleratu du: "Olentzero" Pirritx, Porrotx eta Marimototsekin. Bideoklipa ere partekatu du, non pailazoekin, bere musikariekin eta Nerea Andres ahizparekin konpartitzen duen Gabon Gauean girotutako afalondoa.
Urte amaiera "elektrikoa"
Gabonetako diskoko abestiez gain, kaleratu berri den beste kanta batean ere izan da mallabitarra. Kasu honetan, ordea, berak jardun du kolaboratzaile gisa eta ez da bakarra izan: euskal eszenako beste 32 emakumekin grabatu du Zea Mays-en "Elektrizitatea", kantaren eta disko homonimoaren 25. urteurrena ospatzeko egin duten bertsioa.
"Elektrizitatea 25" kantaren bideoa ikusteko egin klik hemen.