Ados klubaren Binakako Txapelketa Mallabitik pasa zen asteburuan

Ander Gomez 2025ko ots. 25a, 07:18

Emakume pilotari profesionalen Ados pilota elkarteak antolatutako Binakako Txapelketak pasa den abenduan hasi zuen ibilbidea eta Iruñean izango du finala, Labriten. Bidean Euskal Herriko 25 udalerri bisitatuko dituen arren, Bizkaiko lau frontoitan izango da bakarrik. Zorionez, horien artean egon da Mallabia I Pilotalekua. Argazkiak: Ados.

Zapatu arratsaldean, Ados klubaren Binakako Txapelketaz gozatzeko aukera izan zuten mallabitarrek. Hitzordu honetan Lehen Mailako partidak jokatu ziren bakarrik (txapelketak Promozio Maila ere baduen arren).

Lehenengo partidan, Barrokalek eta Arrastiak (gorri), Aranburu eta Mujika izan zituzten aurkari (urdin), eta txapelketan duten lidergoa berretsi zuten. Aranburuk eta Mujikak partida osteko adierazpenetan esan bezala: "gaurkoa (zapatukoa) ez zen gure eguna" eta jokoan erosoago aritu zen bikote gorriak "erraz" lortu zuen garaipena, 22-10 markagailuan.

Bigarrena "luze eta gogor" bezala kalifikatu zuten antolatzakuntzatik: Oskoz-Agirre bikoteak (gorri) eta Ruiz de Infante-Orbegozok (urdin) ordubete inguru jardun zuten jokoan. Urdinek lortu zuten garaipena, baina gogor borrokatu behar izan zuten: Galtzen hasita markagailuari buelta emateko lehenengo, eta bukaera aldera —gorriek estutu eta 18 tantora ailegatuta—22ak lortu eta irabazteko.


Jokatutako partiden emaitzak:

  • 🔴 Barrokal-Arrastia 22 | 10 Aranburu-Mujika 🔵
  • 🔴 Oskoz-Agirre 18 | 22 Ruiz de Infante-Orbegozo 🔵