Zazpi Pago, Amaraune, Zaldu trail, Asto trail, Mañaritik Atxetara, Sorginen lasterketa, Aramotz eta Aldapegora mendi lasterketek osatuko dute Durangaldeko Koparen lehen edizioa. Maiatzean izango da lehen lasterketa eta urrian azkena, eta Kopa irabazteko aukera izan nahi dutenek aipatutako lasterketa horietako lautan eman beharko dute izena gutxienez. Lasterketa bakoitza bukatutakoan, lehen 15 sailkatuen artean bukatuz gero, puntu kopuru jakin bat jasoko dute lasterketariek, postuaren arabera.
Emakumezkoen eta gizonezkoen sailkapenak egingo dira eta kategoria bakoitzean 3.000 euro banatuko dira lehen bost sailkatuen artean (500 euro eta garaikurra, 400 euro, 300 euro, 200 euro eta 100 euro). Sari banaketa Aldapegora mendi lasterketa bukatutakoan egingo da, hura baita zirkuituko azken proba.
Antolatzaileen esanetan, Durangaldeko mendi nagusietatik ibiltzeko aukera izango dute parte-hartzaileek, hala nola, Urkiolako Parke Naturaletik eta baita Oiz mendiko txokoetatik ere: "Era guztietako lasterketetan parte hartzeko aukera paregabea dago: harriz beteriko mendi lasterketak, baso-zelai erakoak eta luzera eta gogortasun ezberdinekin".
Honekin batera, Zazpi Pago mendi-lasterketaren antolatzaileek gogorarazi dute Mallabiko lasterketarako izen-emate epea zabalik dagoela oraindik, www.kronoak.com/eu atarian.