Aurreko edizioetan bezala, bi txapelketetan banatu zen AD Mallabia FTk antolatutako Frontenis Maratoi Mistoa: Eskualdekoa eta orokorra. Debabarrena, Debagoiena, Lea-Artibai eta Durangaldea eskualdeetako bikoteen txapelketa jokatu zen lehenengo, goizeko 9etatik aurrera, eta Soraluzetik etorritako Amaia Ariznabarreta eta Mikel Amorós izan ziren garaile. Eskualdeko txapelketa irabaztearren garaikurra eta 100 euro jaso zituzten sari.
Txapelketa Orokorrari goizeko 11etan ekin zioten eta, lehia honetan eskualdeko bikote batzuk ere parte hartu zuten arren, bikote errioxar-burgostarrak lortu zuen garaipen garbia: Lorena Barron (Errioxa) eta Jony Serna (Burgos) 13-4 markagailuan gailendu ziren Julen Insausti (Iruña) eta Laura Saezek (Gasteiz) osatutako bikotearen aurka. Barronek eta Sernak txapela jantzi zuten, eta 400 euroko diru-saria jaso zuten; Insaustik eta Saezek, berriz, garaikurra eta 300 euro. Hirugarren eta azken saria etxean geratu zen: Itsaso Praderak eta Andoni Aldapek osatutako bikoteak garaikurra eta 200 euro izan zituzten sari.