Bere propietateengatik erabiltzen da medikuntzan, botika bihurtuta, tentsio altua orekatzeko eta baita antsietatea, lorik eza eta estresari aurre egitera bideratutako tratamenduetan. Bere lorak, infutsioan, odola mehetzeko erabiltzen dituzte askok. Osasun kontuak kontu, baserri giroan, ostera, ortua jada landatzeko prest dagoela iragartzen du.
Santa Agedako kantu-jiretan, makilekin lurra kolpatuz, lo-zorroan dagoen Ama Lurrari deiadar egiten zaio, esnatu dadin eta epeltzen-epeltzen udaberrirako prestatzen joan dadin. Hilabetetxo batzuk ematen ditu hasperenka eta indarge: alperrik erein zeozer, kostata erneko ditu aziok eta egin ezkero ere aleak txikiak emango ditu oraindik. Baina elorri arbola zuritzen hasten denean, lurrak abisua botatzen du: epelduta ditu barrenak eta ortuan sasoiko landarak sartzeko momentua ailegatu da. Aurten ez dira elorri guztiak sasoi berean loratu, arraro ibili da eguraldia, euri asko egin duenez, zopa-zopa eginda umelegi egon da lurra. Baina azken beroek astindu ederra eman diote; prest eta guri dago landatze kontuetarako. Ia orain aroak laguntzen duen!