Ekainaren 14an ospatuko da Mallabiko VII. Gazte Eguna eta gazteek kirola egiten emango diote hasiera egunari: 11:30etik aurrera palako partidak (semifinalak eta finala) jokatuko dituzte eskolako frontoian. Lehia bukatzean, plazarako bidea hartuko dute guztiek batera, musikaz lagunduta. 15:00etan txupina botako dute, jaiari hasiera ofiziala emanez, eta elizpean elkartuko dira gazte-bazkaria egiteko. Bazkalostetik aurrera, musikak ez du etenik izango: lehenik, bingo musikatuan arituko dira (goiko argazki-galerian iazko irudiak ikusgai); 18:30ean —eta eguraldia lagun bada— bueltatxoa egingo dute karro-poteoan; eta 21:00etatik aurrera, kontzertuak izango dira plazan.
Orrues taldeak zabalduko du gaueko musika egitaraua. Ondoren, 22:30 aldera, iazko kartelean ere izandako Gorrotoa Gorroto taldearen txanda izango da. Gauerdian, "Herriko hiru gazte musika ipintzen" saioa eskainiko dute plazan, eta, 02:00etatik aurrera, Dj Totozer-ek girotuko ditu festaren azken orduak, Askalde Elkartean.
Antolakuntzatik gogorarazi dute Gazte Eguna ospatzeko "guztion laguntza beharrezkoa dela" eta biharamunean garbiketa lanak egingo dituztela elkartean, "beste behin festa giroa eta parte-hartzea uztartuz".
