Atzo, ekainaren 17an, RTVEko "La Revuelta" programa bisitatu zuen Izaro Andres Zelaieta musikariak. Euskal eszenako hirugarren artista da bertatik pasatzen. Berri Txarrak taldeko Gorka Urbizu eta La Polla Records-eko Evaristo Páramos izan ziren aurretik. Lekunberriarraren eta aguraindarraren elkarrizketak kate pribatuan emititu ziren, programak "La Resistencia" izena zuenean. Izaro Andres izan da lehena estatuko telebista publikoan agertzen, prime time-an eta euskarazko aktuazioa eskaintzen.
Baiuca artista galiziarrarekin batera bertsionatutako Mixel Labéguerie kantautorearen Xorieri mintzo zen abestia interpretatu zuen, talde polit batez inguratuta: Koruak egiten egon ziren Olatz Salvador, Valeria Castro eta Garazi Esnaola (IZAROren pianista); txalaparta eta adarra jo zituzten Oreka TX taldeko Harkaitz Martinezek eta Mikel Ugartek; dantzan aritu ziren Paula Martinez, Garazi Etxaburu, Jaiotz Osa eta Carlos Ojeda; eta elektronika doinuak Baiucak berak jarri zituen.
Latinoamerikarako hegazkina hartzear
Bizkaia Arenan 6.000 lagunetik gora sartzen bukatu zuen maiatza mallabitarrak eta, ekaina hasieran, kolaborazio-kantuez osatutako EPa argitaratu zuen: Perlak.
Orain, uztaila heltzean, cerodenero agurtzeko azken bira egingo du, non eta Latinoamerikan. Hiru kontzertu eskainiko ditu: Dominikar Errepublikan, Guatemalan eta Mexikon (guztiak hiriburuetan). Mexikarrekin berriz ere izateko "irrikitan" dagoela kontatu du. Erdialdeko Amerika aurrenekoz bisitatuko du eta "lehen aldi eder bi" espero dituela dio mallabitarrak.
