Irailaren 5ean, osteguna, mendiko bastoien teknika ikastaroa eskainiko du Iñigo Lariz kirolari elgoibartarrak.
Saioa 18:00etan hasiko da, Lobiano Kulturgunean. Bertan, hitzaldi teorikoa egingo da —"laburra", agindu dutenez— non bastoien garrantzia, funtzionamendu egokia eta eszenatoki desberdinetan hobetzeko teknikak aurkeztuko diren. Ondoren, inguruko mendietara joko dute, "ikasitako guztia praktikan ipintzera".
Gonbidapen irekia
Ikastaroan parte hartzea doakoa izango da eta, Hiru Txikiak trail-era apuntatutakoez gain, interesa duten herritar guztiei luzatu diete gonbita. Hori bai, mendi-irteerarako "bastoia, arropa eta oinetako aproposak" ekartzea gomendatu diete guztiei.
