Euskal Herriko ehunka andrazkok jokatu zuten erraketa modalitatean profesional mailan han-hemenkako frontoietan. Eibarrek izandako hiru erraketista eskolek sasoi bateko zaletasunaren berri ematen dute eta, gertutasunagatik ez bada ere, ermuar eta mallabitar ugari ibili ziren bertan.
“Durangaldeko erraketistak, ahaztutako pilotari aitzindariak” izenburuko artikuluaren osagarri, Durangaldean jaio edo bizi izan diren 31 pilotari profesionalen izenak batu ditu Estibalitz Gonzálezek, argazkiz lagunduta gehienak.
Berriz, Durango, Elorrio, Ermua, Iurreta, Mallabia eta Zaldibarko kirolari haiek urruneko frontoietara eraman zituen lanbideak, kasu askotan itzulerarik gabeko bidaietan zehar. Hamarkada luzez isilean eta ahaztuta egon diren haiek oroitzapenaren bitartez berriro kantxaratzea du asmo artikuluak.
Astola urtekaria 7 euroren truk eskuragarri egongo da bailarako ohiko salmenta lekuetan. Ermuan hain zuzen Maribel eta Xiripot liburu dendetan, eta abenduan beti bezala Durangoko Liburu Azokan.
