Gaztekimen oinarrizko lanbide heziketako ikasleei zuzedutako ekimena da eta Durangaldea hobetzeko prozesuan gazteen partaidetza aktiboa sustatzea du helburu, lankidetza-espiritua eta gizarte-kohesioa sustatuz. Ermua-Mallabia, Durango eta Maristak institutuetako ikasleek hartu dute parte eta 7 talde ailegatu dira finalera. Atzo aurkeztu zituzten proiektuak, Durangoko San Agustin Kulturgunean ospatutako ekitaldian. Behin aurkezpenak eginda, luntxa izan zuten eta, bitartean, epaimahaikideak batu ziren eztabaidatzera.
Epaimahaiaren erabakia
Adierazi zutenez, aurkeztutako proiektu guztietan "sormen eta berrikuntza nabarmenak, lantaldean aritzeko gaitasuna, lankidetza sustatzeko ideiak, eta inklusio eta berdintasuneko baloreak" erakustea lortu dute. Nahitaez, hiru proiekturekin bakarrik geratu beharra zeukaten ordea. Durangarrei eman zieten hirugarren saria (escape room esperientzia) eta bigarrena (karting saioa); baina Ermua-Mallabia OLHko 4 ikaslek osatutako taldeak lortu zuen lehen saria eta, hortaz, esperientzia potoloena: Uretako/mendiko abentura jarduera baterako bonoa.