Euskadiko Odol Emaileen autobusa 14:00ak arte egongo da irekita goizez eta 16:30etik 21:00etara zabalduko dute arratsaldez. Orain joateko asmoa dutenek ondo gosalduta joan beharra daukate; arratsaldez, "bazkaldu eta bi ordura" gerturatzeko eskatu dute.
Lehen aldia bada, 18 urtetik 65 urtera bitartekoek eman dezakete odola. 65-70 bitarteko ohiko odol-emaileek ere eman dezakete, baldin-eta: "Azken bi urteetan odola eman badute eta 70 urte baino gutxiago badituzte". Azaldu dutenez, "sistemak ez dizkie deialdien mezuak helarazten, lehen 65 urtera arteko limitea zegoelako, baina orain 70era arte luzatu da eta posible dute". Pisuari dagokionez, 50kg baino gehiago izan beharko dute.
Egungo odol-mailak
Odol mota desberdinen premiari dagokionez, gaur, otsailaren 20an, A negatiboaren beharra dago batik bat. O negatibo eta AB negatibo erreserbak ere baxu daude, eta hurrengo 2-3 egunetan odola emateko eskatu dute.
Dena den, odol mota edozein dela ere, "baita ez badakite zein motatakoa den ere", autobusera gerturatzeko eskatu diete Ermuko eta Mallabiko bizilagunei.
Egin test azkarra online
Pertsona batzuk ezin dute odolik eman osasun egoera edo bestelako arrazoiengatik. Zalantzak dituztenek autobusean bertan argitu ahalko dituzte baina, bestela ere, Euskadiko Odol Emaileen test arina egin dezakete etxetik bertatik. Odola eman dezaket? testa betetzeko egin klik hemen.
Hala ere, gogoratu dute azken hitza autobuseko medikuak duela: "Testak ez du ziurtatzen odola eman ahal izatea, autobusean galdera zehatzagoak egin daitezke eta horren arabera hartzen da erabakia".