Atzo, Ermuko udaletxera gerturatu ziren erronka aurkeztera Lesbos proiektuaren buruak, laguntza emango duten sukaldariak, eta Debabarreneko Udaletako alkate eta zinegotziak.
Zaporeak elkarteko lehendakariak gogoratu zuenez "sei hilabeterako joan ginen, Siriako gerra ordurako amaituko zela pentsatuta, eta justu atzo zortzi urte bete ziren lehenengo otordua eman genuenetik". Urte guzti hauek errefuxiatu kanpamentuko pertsonei otorduak eskaintzen eman dituzte. Mireia Alonso sukaldari eibartarrak azaldu zuenez, egunero 125 kilo arroz eta 125 kilo lekale prestatzen dituzte, eta asteko bi egunetan bakarrik proteina, "oilaskoa edota haragi txikitua".
Gaur egun, 2.500-2.600 otordu inguru banatzen dituzte. Duela gutxi 3.000 otordura ailegatu ziren, baina ezin izan omen dute erritmoa mantendu "suposatzen duen diruagatik, esfortzuagatik eta lekuagatik". Otorduak banatzen jarraitzeko eta kanpamentuko jendea janari barik ez lagatzeko, Lesbos erronka eta Tuper Solidarioaren edizio berria jarri dute martxan.
Ermuan arroza, Mallabian makarroiak
Bilketa martxoaren 24tik 28ra bitartean egingo da eta herri bakoitzean janari desberdina jasoko da: Eibarren pardina dilista bilduko da, Elgoibarren garbantzu pedrosillanoa; Mutrikun arraina kontserban; Mallabian eta Mendaron hodi erako makarroiak; eta Deban, Soraluzen eta Ermuan arroz luzea.
Tuper Solidarioa Ermuko plazan
Martxoaren 29an (zapatua) erronkaren amaierako ekitaldia egingo da Orbe Kardinalaren plazan: Tuper Solidarioa. 14:00-15:00ak bitartean, bost euroren truke, bazkaltzeko tuperra jaso ahalko dute laguntzera animatzen diren ermuarrek, mallabitarrek eta bertaratuko diren debabarrendarrek. Aurtengo tuperren jakiak honakoak izango dira: Arroza oilaskoarekin, dilistak bakailaoarekin eta fruta pieza bat.
Horrez gain, laguntza eman daiteke errifa solidarioan parte hartuta (txartel bakoitzak euro bateko kostua izango du) edo zuzenean dirua dohaintzan ematen (azaldu zutenez, bertan derrigorrez erosi beharreko barazkiak eta haragia erosteko "oso baliagarri" dena).
- Lesbos proiektuaren inguruko informazio gehiago zaporeak.eus webgunean.
- Donazioak lotura honetan egin daitezke.