Martxan da aurtengo Euskaraldiaren gune ibiltaria. Atzo Galdakaon izan zen eta gaur, martxoaren 21ean (ostirala), Ermura iritsiko da. Patxi plazan muntatuko dute aurtengo edizioaren erakusleihoa dena: Bertan, Euskaraldiaren inguruko informazioa jaso ahalko dute herritarrek, izena eman eta baita arropa ofiziala erosi ere. 17:00etatik 20:00etara bitartean egongo da zabalik.
Alternatiba sarean
Gune ibiltariak —herrietan Euskaraldia badatorrela jakinarazteaz gain— horren inguruko informazioa eta produktuak aurrez aurre erakusteko balio du. Baina sarean ere ekintza berberak egiteko aukera dago:
- Euskaraldiaren dendan aurtengo edizioko kamiseta, jertse edota poltsa ofizialak eskuratu daitezke.
- Inskripzioa egiteko, sartu izen-emate formularioan eta aukeratu zure rola: Ahobizi edo Belarriprest.
Txapa jasotzeko informazioa aurrerago emango dute Mallabiko eta Ermuko Euskaraldiko batzordeek.
