Irailaren 20an jokatu zen Ermuko Hiru Txikiak Traila eta, aurten ere, Julen Olaizola Izagirre ermuarrak lortu zuen markarik onena egitea (3:52:00), traila lau ordu azpitik egin zuen lasterkari bakarra izanik. 2024ko markarekin alderatuta, ia bost minutu arinago helmugaratu zen: iaz 3:56:58ko denboran egin zuen, Victor del Águila entrenatzaile katalanarekin batera gurutzatuz. Aurten, hamar minututik gora atera dizkio hurrengo korrikalariari: Bigarren ailegatu zen Pablo Doña Girón malagarra (4:04:40). Hirugarren posturik onena, berriz, Eibarrera eraman du Juan Zubiaurre Atxak (4:10:33).
Emakumezkoen artean ere, emaitza bikainak izan dira. Bik amaitu dute top 10ean: Sonia Lopez Bañuelos ermuarra zazpigarren lasterkari azkarrena izan da, emakumezkoen urrea lortuz (4:34:30); eta jarraian ailegatu zen Izaskun Olleta Sanchez iruñearra (4:37:18). Bestalde, hirugarren postua errepikatu du aurten ere Leire Olazabal debarrak (4:59:26).
Beteranoen kategorian, azkarrenak izan ziren Sonia Lopez bera emakumezkoetan eta, iaz bezala, Ramon Carrasco ermuarra (4:43:17) gizonezkoetan. Ermuarren kategoriari dagokionez misteriorik ez, kategoria nagusietako irabazleak izan ziren bertako korrikalari onenak: Julen Olaizola eta Sonia Lopez. Mallabitar azkarrenak Lorea Totorica Val (5:33:50) eta Asier Arellano Elorza (6:58:06) izan dira.
Gazteen trailean, Laudioko Xabier Arranz Moscoso izan zen lehena (1:12:07) eta Elantxobeko Koldo Basterretxea Arego bigarren (1:14:51). Hirugarren postua Ermuan geratu zen, Beñat Bouzo Garciaren markarekin (1:21:36). Nesketan, Bilbotik etorritako Irati Guerra Moralek egin zuen lehen postua (1:36:05), bigarren geratu zen Garazi Marquez Cascan ermuarra —iazko irabazlea 2:02:31 denborarekin eta aurten bi orduko langa gainditzea lortu duena (1:55:59)—, eta hirugarren Ane Añel Cid ermuarra (1:59:33).
Sailkapen osoa ikusteko egin klik hemen.