Irailaren 21ean, goizean goiz, auto zaharrez bete zen plaza, Ermuko Auto Klasikoen Topaketan izena emateko prest. Hogeita hamar urtetik gorako 70 auto inskribatu ziren eta, behin izen-ematea itxita, bolantean jarri eta ibilaldia egin zuten inguruko errepideetan. Trabakua Behekoa jatetxean ohiko geldiunetxoa egin zuten eta, bertan ongi etorri luntxa janda, Ermuko plazara bueltatu ziren. Orduan gerturatu ziren zale eta herritar kurioso gehienak, automobilismoaren altxor horiek ikustera eta bere jabeekin berba egitera. Bukatzeko, ErmuClassic elkarteko kideek sari banaketa egin zuten.
Auto zaharrenari, berezienari eta talde ugarienari saria
Auto zaharrenaren saria 1972. urteko Toyotak jaso zuen; epaimahaiaren hitzetan, "automobilismoaren historian erresistentzia eta zaintzaren adibidea" delako. Kotxe berezienaren saria Mitsubishi 3000 bati eman zioten, "bitxi" bezala kalifikatuz eta bere "aparteko dotorezia" nabarmenduz. Bukatzeko, talde klasiko ugarienaren errekonozimendua Red Dragons arrasatearrek jaso zuen; antolatzaileen esanetan, "merezitako saria": "kide dezente bertaratzeaz gain, giro paregabea sortu baitzuten".
"Edizio ahaztezina"
Antolatzaileen ustetan, sortu zen jai-giroak, modelo aniztasunak eta bertaratutakoen aldarteak "ahaztezin" egin zuten VIII. edizio hau. Ermua "aire libreko benetako museoa" bihurtu zela diote, eta harro azaldu dira, "gurpildun altxorrak diren kotxe hauek miresteko aukera izateaz gain, motor klasikoaren pasio partekatua indartzeko hitzordu paregabea" izan zelako.