Azarokoa izango da Drogetenitturri aldizkariaren azken zenbakia, eta webgunearen azkenengo albisteak ere datozen asteotan ikusiko ditugu. Abenduan proiektu berri bati emango diogu hasiera, eskualdeko proiektu bati: Barrena izena izango du eta, webguneaz gain, egunkari formatuan ailegatuko da astero-astero mallabitarren eta ermuarren etxeetara.
Ziklo hau ilusioz eta alaitasunez amaitu nahi izan dugu eta zer hobe proiektuaren ondoan egon zareten kolaboratzaile guztiokin baino: berriro elkartuz, elkarren berri izan, aspaldiko! ugari esan eta topa egin, izan denagatik eta, noski, etortzear dagoenagatik.
Ermuko eta Mallabiko aktualitatea herritarrei helarazteko erronkan zuek guztion laguntza urre gorrizko izan da aldizkariarentzat eta honek 36 urteotan 228 norbanakok hauspotu duzue: izan koordinatzaile, artikulugile, iritzi-emaile, argazkilari, banatzaile, publizista… Ekarpen txikia zein handia izan, guztiak baleko!
Aurreko asteetan zenbaki guztiak banan-banan begiratu ditugu kolaboratzaile guztion izen-abizenen zerrenda osatzeko eta ederra izan da atzera begirako ariketa hori ere: urrunago bizi direnen edo laga gaituztenen izenak idaztea, izandako sail desberdinak gogoratzea, diseinu eta formatu aldaketez jabetzea…
Iñaki Arregik, aldizkariaren sortzailetako batek, beti esaten zuen “Drogetenitturri mirari bat” zela eta mirari hori gauzatzen zuek eta etortzerik izan ez duen beste mordotxo bat ezinbesteko izan zarete. Abenduko azken alearekin agur esango diogu Bizkaiko tokiko komunikabideetako dekanoa den txiki estimatu honi eta ongi etorria jaiotzear dagoen Barrenari.
Banan-banan eta bihotzez, eskerrik asko zuen jakinduria eta konpromisoa herritarrekin partekatzen laguntzegatik, eskerrik asko iturri honen emaria aberats eta etenik barik mantentzen laguntzegatik!
Bejondeizuela!