Abenduaren 14an (etzi) Palestina Eguna ospatuko da. Ermua Palestinarekin Ekimenak antolatutako jardunaldia izango da eta ekintza guztiak Orbe Kardinalaren plazan burutuko dira.
12:00etan hasiko dira, haurrentzako tailer desberdinekin: txapa eta pultserak sortzen, henna tatuaiak egiten, aurpegiak margotzen, misilari tiro!-ra jokatzen... Goizean zehar herriko artista desberdinek murala margotuko dute eta Euskal Herriko 23 ilustratzaileren artelanekin egindako "Kulturatik Genozidioa STOP - Kultur Sortzaileak Palestinarekin" erakusketa egongo da ikusgai. Azarotik egon da Lobianon eta Ermuko hainbat dendatan, eta honakoa izango da herrian ikusteko azken aukera.
13:00etan, herritarrez osatutako giza-katea egin nahi dute eta antolakuntzatik Ermuko bizilagunak gonbidatu dituzte, "katera batu eta Palestinako herriari elkartasuna adierazteko". Bukatzeko, bi kontzertutxo egongo dira, 13:30ean hasita: Patxi Dinamita eibartarra eta Jon Moma ermuarra arituko dira, formatu akustikoan.
Patxi Dinamita Sallabenteko frontoian, ekainean ermuarrek eta eibartarrek egindako martxa bateratuaren ostean.
